30 lot czekanio i styknie. Fusbalowy majster wraco nazot na Górny Ślōnsk.
Łostatnio, w "Łokiym regiōnalisty" chyba żech wykrakoł, że nastympny felietōn bydzie ło fusbalu. Ale że tyla te nasze ślōnskie manszafty napochajōm za tyn czos, to bych sie w życiu niy spodziywoł.
Zaczynōmy łod tego, z czego wszyskie prowdziwe, ślōnskie kibice majōm nojwjynkszo ućycha - majstra w tym sezōnie zrobiōł Piast Gliwice i chyba kożdy to przizno, że chop, kiery za tym stoi, to tryner - Waldek KING Fornalik.
Pora lot tymu mało brakło, a majstra zrobiłby z Ruchym. Z Ruchym miszczym był, jak jeszcze we fusbal sōm groł - w 1989 roku. I było to łostatnie miszczostwo do drużyny z naszego regiōnu.
Aż do wczoraj. Bo liga sie już skōńcyła i to Piast jōm wygroł - w tabeli na kōniec mo sztyry punkty przewagi nad warszawiokami z Legii i to Gliwice terozki majōm szansa na Liga Miszczów.
Cieszōm sie tyż we Zobrzu. Górnik niy ino w lidze sie uczimoł, ale mo tyż w swoij kadrze nowego króla szczelców. Bo Igor Angulo w tym sezōnie trefił dwajścia sztyry tory - nojwjyncyj w Polsce - i bezto doszlusowoł do galerii lygynd Górnika takich jak Ernest Pol, abo Włodzimierz Lubański, kierzy tyż tyn tytuł sie "wyszczylali".
I to by bōło tyla, jak idzie ło Ekstraklasa, a niżyj... bydzie już ino gorzij.
Przed sezōnym, po cichu, liczył żech, że w tym roku pjyrszo liga wygrajōm dwa GKS-y: tyn z Tychów i tyn z Katowic. Psinco. Tychy grały raczyj średnio, a Katowice... śleciały z ligi.
Budżet majōm ino trocha mniyjszy łod Piasta, fusbaloków tyż cołkiym-cołkiym, i co? Roz jeszcze psinco - łod nowego sezōnu czeko ich czeci pozióm rozgrywkowy. Szkoda.
Na ja. Ale co majōm pedzieć w takim Chorzowie, kaj czeci rok z rzyndu lecōm liga niżyj i terozki bydōm grać w czecij (czyli tak naprowdy czwortyj) lidze. Abo w Bytōmiu, kaj i Polōnia i Szōmbry sōm w piōntyj klasie.
Polōnia mo w tym sezōnie szansa na awans liga wyżyj, kaj może zagro z Ruchym. I tym z Chorzowa, i tym z Radziōnkowa. Chocioż tyż niy wiadōmo, bo przeca Radziōnków może zlecieć, a Chorzów sie... rozlecieć.
Mele sie tam na tyj Cichyj, prezesy wadzōm sie z kibicami, a Gerard Cieślik sie w grobie przewraco.
Co to dalij bydzie? Z Ruchym, Gieksóm i inkszymi naszymi manszaftami...
Jak to we fusbalu bywo - móndżyjsi bydymy za rok, a terozki wsziscy czimiymy za Piasta, coby do tyj Ligi Miszczów wloz, a potym, nojlepij na Sadiōnie Ślōnskim, klupnōł jakij Barcelōnie abo Ryalowi Madryd.
Przeca z takim trynerym jak Waldek KING wszisko jes możliwe, pra?
*
Felieton z cyklu Okiem regionalisty
aktualna ocena | 5,0 |
głosujących | 1 |
Ocena |
bardzo słabe
|
słabe
|
średnie
|
dobre
|
super
Nowe szczegóły dotyczące warsztatu mistrza włoskiego renesansu.
Opowieść o życiu Jezusa i apostołów pojawi się premierowo na wielkim ekranie.
Złota Palma w Cannes, dwa Oscary + cała lista innych ważnych nagród i nominacji.
Archeolodzy o odkryciach dawnego królestwa Kaabu w Gwinei Bissau.
Śmiało można stwierdzić, że lektura książki "Chopin" to pełnowymiarowe spotkanie ze sztuką.